【增強抵抗力】虎乳靈芝淮山麥冬瘦肉湯

真係幾討厭落雨天，冇得出去玩之餘依啲天氣都真係好易病，尤其就嚟又要開始學校生活，所以都要為小小豬打好個底，等佢有個好體質同埋增強抵抗力，就可以開心健康咁繼續返學啦！

一到左依啲天氣又係我煲虎乳靈芝嘅時候，今次我加埋淮山、麥冬、蓮子...等一齊煲靚湯，除左可以增強抵抗力之，仲可以有助補血氣、強體質同埋潤肺止咳嘅功效呀~

虎乳靈芝對補益肺氣，對提高免疫力都有好有幫助；淮山健脾開胃、肺氣虛燥；麥冬具清熱養陰、潤肺養胃；百合有潤肺同清心安神作用；蓮子有助於氣血循環，亦有養心安神、健脾補腎；蜜棗潤肺止咳；南北杏可止咳下氣，潤燥消積。(網上資料)

虎乳靈芝半両、淮山半両、麥冬半両、蓮子半両、百合半両、南北杏一湯匙、蜜棗三粒、瘦肉約$35~

 將所有藥材浸洗一陣~

瘦肉汆水~

煲內放約2.5L水，然後隨水加入材料~

待滾起後，先用大火加蓋煲約15分鐘~

之後轉慢火加蓋煲多1.5小時~

最後加鹽調味，就可以飲得啦~

雖然係用左一大堆藥材嚟煲，但飲落一啲藥材味都冇，飲落仲甜甜地，所以今次兩位老細都飲得好滿旎，話咁快每心兩大碗咁清晒。不過....如果各位大小朋友病緊嘅時候，就唔好飲住，要等好番先可以飲啦！

溫馨提示：
- 由於個別人仕體質不同，所以大家記得煲之前了解下自己，如有疑問，請先向註冊中醫查詢！