【過來人分享】改善濕疹的幾個簡單生活小改變

By 雷囡媽媽 on 28 Aug 2018

全職湊住2隻傻豬豬，簡簡單單都可以食好啲，教你輕易煮。食得好之餘，又可以慳返啲時間陪佢地。珍惜優質親子時間。

小朋友有濕疹，做父母一定好心痛。

我都係過來人，雷囡s細個時都係有嚴重濕疹。大囡屬異位性濕疹，一般喺手腳關節位。嚴重時全身都係，摸落拮手，好似荔枝殻咁。真係心痛到喊住幫佢搽藥膚...諗返起都濕眼眼..
不過好彩到6歲左右開始情況有改善，到而家間中轉天氣或食太多致敏食物會起返少少。不過好彩唔算嚴重，搽幾日野就冇乜事。

濕疹呢個話題真係日日都講。無論係電視，報紙，網上甚至係朋友間。今日咁啱睇電視講緊濕疹個案。睇到個案中主角濕疹咁嚴重，真係勾起我大囡慘痛經歷。但睇到主角嘅片段裡面，出現左一啲濕疹大敵。所以即時好想同大家分享。

其實我知道所有有濕疹嘅朋友，或者係家人有濕疹嘅朋友，都一定睇過無數咁多嘅皮膚科，搵個無數咁多嘅坊間食療，搽藥膏，搵致敏源...等。所以呢啲野我就唔多講啦，畢竟我唔係醫生。其實我所講嘅野可能係人都知，但講真唔多人做到！

小朋友濕疹嚴重，最大問題係唔肯戒口！
汽水（特別係可樂！）、凍飲、甜食、糖果、朱古力。
一！
定！
要！
戒！

講真，要戒呢啲野應該8成人都知，但幾多個真會戒到？我身邊太多朋友自己或家人有濕疹，甚至係嚴重濕疹！但每次同佢地食飯都係叫一杯可樂...見一次講一次，講到我都冇氣喇...
正如啱啱睇到果位嚴重濕疹嘅小朋友，凍飲，汽水加冰，甜食樣樣齊...

另外就係運動！出汗！

運動出汗係最好嘅排毒方式，但好多媽媽因爲小朋友有濕疹，就怕佢運動後出汗會好痕好唔舒服，甚至汗水會令「血淋淋」嘅傷口好似灑鹽咁痛。但以我大囡經驗嚟講，初初開始運動出汗小朋友會覺得唔舒服，只要做完運動即時沖涼換衫，慢慢情況會改善。
當然因爲佢地怕痕，叫佢做運動真係唔容易。但換個運動方式。去公園玩，跑下跳下一陣就成身汗啦。玩得開心次餘，對身體各方面都有好處。小朋友點會抗拒？