BB保你大 ～ 女女產程絕密公開

呢世女最值得紀念嘅一日，不枉此生了！

係一個月黑風高夜晚，攬住老公強勁嘅臂灣，差唔多瞓着嘅時候⋯⋯突然間，覺得兩腿之間有啲暖暖地嘅感覺⋯⋯一摸，濕既！！！嗰一刻我就知，我既女王生活要完結啦⋯⋯（題外話：由嗰日之後到而家，我都未試過有一覺可以瞓超過四個鐘了⋯⋯）

穿水之後我即刻跳入浴缸，攞水輕輕沖沖下半身，準備換衫去醫院，我大叫我睡眼惺忪嘅老公拎衫比我換！我見佢即刻跳落床，好忙咁起勢走來走去！換衫，final check走佬袋，抹地，襪都着埋，準備call 車⋯⋯但係都仲未攞衫俾我，佢仲望住企係浴缸光脫脫嘅我，同我講『行得啦！』

去到醫院，老公一枝箭咁衝左入去，同人講『我老婆穿水呀』啲姑娘好淡定咁話，『佢個人係邊呀？叫佢入嚟登記先啦！』

第二日一朝早入產房催生，初初我仲「輕輕鬆鬆鄧子鋒」，喺度un fitball，同姑娘吹水！又嫌唔夠痛，問姑娘可唔可以加多D藥！我老公就好眼瞓，喺隔離瞓咗覺⋯⋯

點知突然間條腰劇痛！係劇痛！痛到好似就黎斷咁！個痛完全蓋過陣痛，我要求轉四腳扒扒pose，不過吉住粒豆要轉來轉去真係好麻煩！姑娘話應該係BB頂住左我lower back，頂到成個lower back腫咗出嚟了！之後叫咗香薰按摩師黎幫我按摩，係舒服左少少，不過都係好痛！

終於我痛到好攰，瞓返落床，一瞓底就好急屎！Shit！好想屙屎個感覺真係好難受！我終於忍唔住喊咗出嚟！姑娘見到好緊張，即刻除我條褲睇下，已經爆曬血！跟住佢即刻call醫生嚟，佢話懷疑可能頂爆左D野，醫生檢查完話冇問題，打咗支止痛針，順便插尿喉，繼續催生⋯⋯

係聞笑氣聞到我迷迷糊糊嘅時候，個按摩師又返咗嚟，今次幫我按小腿！但係我已經痛到暈暈地，按摩已經幫唔到我⋯⋯而且呢個好想屙既感覺仲越嚟越強烈！！

終於到開夠10度！原本我係想試其他生產嘅姿勢，但到左最後關頭，我冇曬心情啦，淨係想快啲屙佢出嚟！醫生叫我點就點啦！！用了最傳統嘅姿勢，push左5下！終於生左了！！

一出世醫生就直接將BB放左喺我心口，濕濕暖暖的，聽到你係我心口第一聲喊聲！我知道，由呢一刻起⋯⋯#我就是你的人#

自首：不吃不喝左12個鐘之後，生完第一樣食嘅野係⋯⋯雲呢拿雪糕(唔好打頭）