【健脾養陰】蘋果淮山水

前幾日睇報紙見到有食譜介紹蘋果淮山水，有健脾養陰同幫助消化功效。

一睇到健脾同助消化我就當然即刻想煲俾小小豬飲，等佢健脾多啲就可以食得多啲，咁就可以快啲肥多啲啲(唉...你估成日俾人話小小豬奀豬豬，作為媽咪嘅會開心咩，佢食極都係咁你估我想嘅咩.......發勞蘇完畢)~

蘋果具有生津止渴、潤肺除煩、健脾益胃、養心益氣、潤腸、止瀉、解暑、醒酒等功效；淮山健脾開胃，其他好處為治療久泄久痢、肺氣虛燥、及消渴尿頻等症。(網上資料)

蘋果兩個、淮山一兩、冰糖適量~

蘋果刮去果蠟後去芯切塊~

淮山浸洗一陣~

煲內放約2L水，然後隨水加入所有材料(冰糖除外)~

待滾起後，用大火加蓋煲約15分鐘~

然後轉慢火加蓋煲多30分鐘~

最後加入適量冰糖，再煲多10分鐘~

飲得啦~

基本上我都成日用蘋果煲涼茶俾小小豬，次次都一定非常樂意飲晒成樽，咁就因為甜甜地佢不知幾鐘意飲。今次我加左淮山，但係都唔算好重味嘅藥材，所以今次小小豬依舊鐘意。

雖然未知係咪真係對健脾有益，但只要小小豬鐘意飲，咁多多煲有益涼茶都唔錯呀！

溫馨提示：

- 由於個別人仕體質不同，所以大家記得煲之前了解下自己，如有疑問，請先向註冊中醫查詢！