【 滋陰潤肺】雪梨乾海底椰雪耳瘦肉湯

終於打敗仗，食藥都食到我傻傻又口淡淡，冇胃口食飯但有少少湯癮起，所以就簡簡單單煲過啱依個轉季天飲，清甜又滋潤雪梨乾海底椰雪耳瘦肉湯啦~

雪梨乾具生津潤燥、清熱化痰之功效，雪梨本身屬寒涼之物，但雪梨乾經過烤焗後反而潤而不寒；雪耳有助潤肺、潤膚同養顏嘅功效；海底椰有助清燥熱、止咳、滋陰補腎；無花果潤肺止咳、清熱潤腸。(網上資料)

雪梨乾一兩、雪耳一兩、海底椰一兩、無花果三粒、南北杏一湯匙、瘦肉$30~

雪梨乾、海底椰 、 無花果及南北杏浸洗一陣~

雪耳浸透，然後剪去硬蒂~

瘦肉汆水備用~

煲內放約2L水，然後加入所有材料~

待滾後，先用大火加蓋煲約15分鐘~

再轉慢火加蓋煲多1.5小時~

最後加少少鹽調味就飲得啦~

係唔舒服嘅時候飲啖清甜又好潤嘅湯，真係即刻有返啲精神得。所以話...飯可以唔食，但湯就唔可以唔飲。小小豬都已經學左依一點，所以定時定候就會提我煲湯俾佢飲啦....哈哈哈！

溫馨提示：
- 由於個別人仕體質不同，所以大家記得煲之前了解下自己，如有疑問，請先向註冊中醫查詢！

- 雖然雪耳係好味又有益，不過都要再提多大家煲過嘅雪耳一定要即日食/飲晒，如果隔夜，經過一夜嘅浸透，佢就會放出一啲有害物，到時就有益變有害啦！