馬後炮式揀收息股

上星期講盈富基金(2800)係靠唔住，唔少戰友就在facebook專頁問，咁咩股先係靠得住呀，咁正路的選擇當然係中電(0002)及煤氣(0003)，而匯控(0005)及香港電訊(6823)都係唔錯嘅。玩得收息股，自然就唔想股價大波動，賺息蝕價一場空又係死，所以坊間教大家揀收息股，都好著重業務及派息的穩定性，但要嚴格地搵符合條件的，在香港真係唔多囉。

早幾日同朋友談論，每年9%財息回報，8年已經可以翻一倍，這個複利增長的確驚人，但要做得到賺息賺價有9厘，的確唔多，上周談及的中電及煤氣，在過去十年都勉強做到。咁買呢兩隻咪冇得輸囉？如果咁易，這個世界仲有窮人咩，這些數據，都是從今天向後計返轉頭，可以講係馬後炮式，但雖則係馬後炮，這10年內跑贏中電的不足200隻股份，佔全個港股少於10%，而當中大部分都係冇乜息派，純粹贏股價升幅。

要有穩定的業務，可以說是半褒半貶，長做長有又較少受經濟周期影響，公用事業應係其一，但唔需要太懂股票都知，這些行業好難奢求高增長，要財息兼收似乎唔易。要有穩定派息就更難，面對金融風暴及海嘯，環球經濟極差，公司業務受打擊係好正常，即使現金充裕，照派畀股東定係積穀防饑，管理層都要諗得好清楚。

中電及煤氣自2003年沙氏之後，派息從未減低，兩間公司都極力維持穩定及漸進式增加。匯控自2009年供股後，將派息政策調整了，雖然業務在雷曼後風光不再，較少跑贏大市，但就做到了派息穩定及漸進增加，而管理層在近年都講過，日後這個政策會恆常化，業務好景，有剩餘資金就會回購，而不會大幅增加派息。而香港電訊在2011年上市後，每年派息都係有多無少，只係2014年要做收購才向股東伸手供股一次，如果你由上市持有至今，又有參與供股，7年來的財息回報係254%，即每年20%，即使我哋apple to apple比較，在香港電訊上市日同時買入中電、煤氣或匯控，結果都係香港電訊跑贏啊。

馬後炮式計完數，就要睇下未來的風險。中電及煤氣，沙氏後都keep到穩定派息，理應最值得信賴，但唔好忘記我們正處於收水期，聯儲局會持續加息，由於聯繫匯率的關係，本港息口始終都會跟隨向上，美國加息8次0.25%，我們只跟過0.125%，這條數始終要還，現時有些中小型銀行的一年期定期存款已有2.5%以上，但煤氣及中電的股息率只有2.2%及3.3%，咁定存息率再上，兩股的吸引力就會大減，市場力量會令股價下調，從而令股息率上升，你買來收息就有機會賺息蝕價。匯控貴為恆指重磅成份股，個市要跌就無可避免會被隊低，即使你業務穩定跑贏大市，結果都只係跌少啲而已。5G即將到來，對電訊業孰利孰弊，仍要估估下，開支難免會大幅上升，收入增長能否升凸，就睇吓到時大家肯唔肯畀多一百幾十，換取更優質的體驗。

聯儲局收水唔只會影響收息股，而是整個金融市場，從而會令環球的資金重新部署，往日零息時代，資金梗係追住收息股來坐，以至股價穩步上揚，財息兼收，正如上文所述，股息率要向上調至那個水平才合理，大家只是摸著石頭過河，都無計架，大家都未經歷過咁大規模的收水嘛，分段入市，萬事小心吧。