【世紀難題】新年出街食定屋企煮？

唔知點解香港人過年咁多飯要食，年三十要團年、初一又要開年。結婚之後仲煩，同老公嗰邊嘅家人安排飯局真係頭都大。到底開年飯、團年飯、乜乜物物飯，出街食定屋企煮好？呢個係一個爭論不休嘅議題！ 就等小編綜合網民嘅意見，畀大家參考吓喇！

出街食：

乾手淨腳唔使煮、唔使洗，夠方便！出面食可以又各自叫鐘意嘅餸，唔怕口味唔同，唔使辛苦完仲畀人嫌三嫌四。但係大時大節出去食要幾千銀埋單，到時唔知邊位俾錢，又唔知各位叔伯兄弟、姑奶嬸婆肯唔肯AA制！如果吓吓要焗住埋單，或者老公搶住畀錢，都真係好「金」！

屋企煮：

過年一定周圍都加價，一家人聚埋一齊食餐飯就得，畀奸商劏到一頸血冇意思。不過如果家族龐大，要煮成十幾廿人份量，分分鐘前一日已經要開始準備。買餸、返到嚟仲要洗切煮，諗起都崩潰！就算唔自己煮，等奶奶大展身手煮完九大簋，之後都要幫佢執手尾.......一個「攰」字都唔足以形容。

新式派：

團年又好，開年都好，都係個家族聚會嚟啫！何不選擇BBQ、訂Pizza/壽司，甚至book Party Room呢？到時大朋友、小朋友都可以自得其樂，唔使坐埋一齊冇嘢講咁尷尬。不過，要家中四大長老夠Open點頭先得！

你又支持邊一派呢？正所謂「家家有本難的經」，出街食同屋企煮都有好壞～各位媽媽要審時度勢啊，希望大家都可以做個好節！