世上又豈只有媽媽好？超強爸爸親子玩樂大全！

自問我都算幾勤力陪仔玩，室內室外乜都玩一餐。但有D玩意，我哩個做媽媽嘅確實有心無力，一定要留返俾爸爸同佢地玩。今日就等我借個機會表揚一下兩兄弟嘅爸爸。

平時爸爸工作好忙，通常只有星期日才休息，但其實哩個休息日比返工還要忙百倍。爸爸好有創意，喜歡DIY，又鍾意鋸吓木咁，成日都有新攪作。上年造嘅雀仔屋，今年就吸引了一隻黑白雀仔嚟住，每朝兩兄弟都會走到樹下探吓佢。

自製保齡球道，D樽係唔會跌，唔洗自己執架(因為用魚絲吊起晒)！球道同時亦係一條平衡木呢！

Sand table - 加個有蓋膠盒就玩得。

自己設計賽車跑道，哥哥幾開心！

膠水樽風車，又真係work喎！

水戰哩D嘢真係唔洗預我，仲要整埋兩個防護盾，D仔冇得輸啦！

街頭曲棍球，雖然支球棒仲長過兩兄弟，但佢地都算打得有板有眼！

放風爭媽媽都識架，不過懶，唔想跑唔想執。

Tobogganning - 滑雪橇，冬天必玩。

爸爸自學ukulele，就係為左陪哥哥練習。

以下幾個「活動」，我覺得喺加拿大長大嘅男孩子都應該要識：

自己搭砌家居，當時只有兩三歲嘅哥哥，都幾幫得手。

洗車換軚，型呀！

破冰小子，出盡力鑿，爽呀！

冬天鏟雪及……

夏天剪草，係加拿大指定動作。

最後，每隔三四星期，爸爸就要兼做埋理髪。

你睇，一日嘅假期係可以用到好盡，冇悶場架！

可能因為陪仔嘅時間唔多，爸爸每次都好珍惜、好專心。佢無論係EQ、耐性、育兒技巧等等都比我優勝(欠缺嘅只係時間)，我係打從心底裡佩服及欣賞佢。

雖然一星期唯一嘅假期都忙得不可開交，但我相信爸爸都係樂在其中，非常享受哩D親子時光。佢確實犠牲左自己好多休息時間，除左係為陪伴兩兄弟成長，佢更加想俾D時間我哩個媽媽休息放鬆下！

其實，世上又豈只有媽媽好！