溫書大作戰｜仔女一溫書就「著火」？爸媽必學「撲火三式」拆解壓力，告別親子角力！

考試季節又到，全家如臨大敵。最令爸媽頭痛的，莫過於一叫仔女溫書，他們就好似「撻著咗」咁，發脾氣、喊、拖延... 搞到屋企日日上演「親子角力」？點解平時明明好乖，一到溫書就變咗「小魔怪」？其實，發脾氣只是表面，他們內心可能承受緊巨大壓力！小編今次同大家深入拆解小朋友發脾氣背後的「情緒語言」，再教大家如何「見招拆招」，幫小朋友（同自己）輕鬆渡過考試期！

點解會「爆」？拆解3大「壓力SOS」

當小朋友一溫書就發脾氣，他們其實是用行為Send緊「求救訊號」。他們不是故意同你作對，而是不懂如何處理自己的負面情緒！

SOS 1：「我好驚，但我唔識講！」

他們不是憎溫書，而是極度恐懼「失敗」。他們可能覺得考試內容太深、範圍太廣，或者好驚考得差會令爸媽失望。「發脾氣」是他們面對巨大焦慮時，唯一識得的表達方式。

SOS 2：「溫極都唔識，我好廢！」

這個是「習得性無助」。當小朋友努力後，但都達不到預期效果（例如溫極都不入腦），他們會覺得自己「好無用」。發脾氣是源於他們對自己的極度失望同挫敗感。

SOS 3：「你哋好煩呀！」

小朋友好似「情緒海綿」，他們完全Feel到爸媽的緊張！你愈焦慮，他就愈大壓力。當他們承受不到自己的壓力，再加上父母的壓力時，就會用發脾氣嚟「反抗」，想攞返少少自主權。

即時拆彈：當下「著火」點算好？

當仔女已經「爆發」緊，講道理是沒用的！我們的首要任務是「先處理情緒，後處理事情」。記住以下「撲火三式」：

第一式：深呼吸，不要「火上加油」

見到仔女爆，我們第一反應都是「火遮眼」想鬧！但記住，你一躁，他只會更亂。
怎麼做： 自己先深呼吸三次，在心入面同自己講：「冷靜！佢唔係特登嘅。」爸媽保持平靜，就是最好的「滅火筒」。

第二式：接收「情緒」，而不是「行為」

不要即刻批評佢「發咩脾氣」、「喊有咩用」。
怎麼做： 試下用「同理心」回應佢的感受。例如：「媽咪知道你溫得好辛苦/好忟。」、「你是咪覺得好挫敗？」當小朋友覺得自己被理解，情緒就會快能回落。

第三式：畀佢「暫停」回氣

在「火山口」上，勉強溫落去只會兩敗俱傷。
怎麼做： 提出「Cool Down Time」。例如：「不如我哋休息5分鐘，飲啖水/食件餅，一陣再返嚟處理？」這個暫停不是妥協，而是讓大家有空間重整旗鼓。

長遠預防：由「對立」變「隊友」

考完一次試，還有下一次。想打破這個惡性循環，我們要幫小朋友建立健康的溫習心態：

1.焦點放在「努力」而不是「分數」：不要再講：「你考唔到第一就...」。

怎麼做： 轉用「成長型思維」鼓勵他們。例如：「爸媽見到你好努力試緊，已經好叻！」、「呢題錯咗唔緊要，我哋一齊睇下點樣可以做得更好？」令他們明白「過程」比「結果」更重要。

2.將「大怪獸」斬件：小朋友一見到成呎厚的書就想放棄。

怎麼做： 運用「蕃茄鐘溫習法」。不要話「溫晒成科」，而是話：「我哋先用20分鐘溫好呢一課，之後就可以休息5分鐘。」將大目標拆細，令他們易點「入手」，增加成功感。

3.建立「溫書儀式感」：一個良好的環境好重要。

怎麼做： 同仔女一齊建立「溫習SOP」： 定時： 每日固定一個時間溫書（例如食完飯後）。 定點： 保持書枱乾淨企理，減少玩具等分心事物。 預告： 提早話他知：「我哋玩多10分鐘就要開始溫書喇。」給他們有心理準備。

總的來說，陪溫書其實是一場「親子EQ修煉」！當我們學識如何拆解仔女的「情緒炸彈」，我們不單止幫到他們學習，還教識了他們如何面對壓力，這個才是終身受用的技能！