打工第一年已經要投資　千里之行始於足下

昨日同太太講，改個筆名。佢話而家幾好幾特別，但其實係我想改！哈哈。。。

見到有保險朋友傳來網文，提及有人工作多年，毫無積蓄。萬一失業、結婚或退休時唔知點算。其實文中都是老生常談，叫人慳錢和及早投資。

回想小弟仲係打工（即畢業後頭兩年），頭半年真係唔夠錢駛，人工八千，比左一半屋企，自己駛一半。新界到上環番工，路途遠車費貴，加埋食飯拍拖（窮拍），每月真係無錢剩，最多剩５００。

當然，下半年轉工，浮浮沉沉，好時過萬，差時六千。投乜鬼資？

唔夠半年再轉，我剛畢業無人理我ＪＵＭＰＹ，反而專業人士資格令人覺得我騎牛搵馬。轉左另一間公司，人工一萬，再加上我秘撈三四千，總算有錢儲下。

之後半工讀左一年，人工好時二萬幾，差時都有一萬。

人生第一個十萬，都係畢業後三年半０既事。之後我叫朋友黎教我投資買股票，佢教我０既係買九巴同匯豐！好彩無買九巴。。。。

畢業後第四年，已開始創業，由十萬到百萬，用了兩年，百萬到千萬，再用了八年。咁慢，不如炒樓加按啦係咪？

回想當初，如果一開始打工便買入碎股，即使只有５００元，當時可以買中電煤氣也好（買匯豐便慘了），或買盈富也好，三厘息計，每５００元每月平均有利息１.２元！哈哈哈！

一年下來，每月利息只有１５元，只能在常時食個下午茶。（中電有５厘，每月２５元，可以食譚仔了！）

當然，一眾財經導師都係教你，及早投資以及複利效應！鬼唔知阿媽係女人咩！

３０年後，儲左１８萬，五厘計，每月終於有７５０現金流了！非常勵志！不過唔好話三十年，二十年後食個下午茶，個價錢都ＤＯＵＢＬＥ左啦！（中電股價都升左ＤＯＵＢＬＥ，股息都一樣０既。。。放心）

與其苦行憎咁慳錢儲，不如努力開下源！將秘撈／兼職收入用黎投資。到你結左婚仔都生埋，你就好多兼職都做唔到架喇。

知識分子，最易搵就係補習。市價１００／小時計，一星期三個鐘（補習仲可以收工晚上做！星期六日又得），一個月都１２００！教琴有更好效果！

老婆話，做台式兔仔奶茶店，請人都５０蚊一個鐘！唔想太多體力勞動？佢鋪頭請個文職妹妹，都有５５－６５一個鐘。今個月佢個大專生番三日都７５００，另一大專生番一日都１６００（兩者時數有別！）

唔好問我請唔請人，ＧＯＯＧＬＥ一下，馬會都有＄４６／ＨＯＵＲ，內行人話一半時間係ＩＤＬＥ！

千里之行，始於足下！心動不如馬上行動啦！

Photo from 圖中為小弟兩個小朋友去朝拜美少女戰士！

＄１６００儲一年，第二年５厘計，平均月息有８０。至少可以交半個電話費／睇場戲。同時正職人工自己洗！如是者，不動用自己人工之下，三年間已可年年加自己人工。

畢業頭三四年，多數同屋企住，食屋企。如能把握最初三年，以正正常常現在畢業人工萬多元計，將正職及兼職收入儲起買收息類股票，雖提供現金流不多，但至少可以幫補一下駛費丫！

講左咁耐，其實都係叫及早投資以及開源比節流好！一來可以享受下微薄投資都有被動收入，二來如果要輸，後生輸好過人到中年先炒單勁！及早遇風浪，好過臨尾收山才來被大浪沖走呢！

如果夠膽少少，唔買港股轉去買美股／其他外國收息系列，再加少少槓桿（真係少少就夠），回報應該可以令頭幾年生活得開心好多。

有咩好提議？小弟投資組合在網誌內提及過好多次，有機會整理成文，再放上親子王國與各位分享。