【親子互動】聖誕親子活動大玩Messy Play！自製仿真雪邊玩邊學ABC與認知

繼續都係在家解悶嘅玩意分享，今次同兩個寶貝女玩嘅係仿真雪。
材料都好容易買到，而且屋企亦有機會會有。

不過，當然唔可以同真雪比啦~

我呢個仿真雪唔會融，亦唔會凍，所以唔怕凍傷小朋友雙手。
不過，幼兒玩樂嘅時候一定要睇實。
唔可以食，而且一個唔小心會一地都係嘅~

材料：
1. 梳打粉及粟粉...1:1比例 (例: 100g : 100g)
2. 水...適量

做法：

1. 將梳打粉及粟粉倒在一個器皿中，沒有先後次序，混埋一齊就可以了。

2. 將水慢慢加入，每次加少少，再用手將粉及水混和至乾爽，不黏手，沒有粉塵即可。

放於手中，不黏手亦沒有粉塵即表示成功。

和牛B同妹妹都有唔同玩法，和牛B可以加入公仔作情景玩具。

而對於年幼嘅妹妹(2歲)，玩法有少少唔同。
可以教佢認知，即: 居住在雪地嘅動物，亦可以用字母圖案印於仿真雪上，學字母。

亦可以讓幼兒用雙手感受，感有唔同嘅質地。

起初妹妹有少少抗拒仿真雪嘅質感同埋覺得污糟，後來佢都好鍾意玩。

2020年出世嘅妹妹，一直在疫情嘅環境下生活。
冇太多機會參與外間舉辦嘅Playgroup...
唯有，自己諗諗辦法啦...

希望疫情快啲緩和，也希望大家身體健康、平平安安!

記得Follow埋我哋Facebook、MeWe同Instagram呀
和牛B & 和牛媽媽 YouTube Channel