【用家分享】大家減齡儲分攻略減齡達人3個月即成功換Garmin運動手錶

By 王國編輯 on 13 Dec 2021

親子王國及教育王國官方編輯，為爸爸媽媽提供優質育兒資訊及教育學習情報。

親子王國討論區大熱post「大家減齡 (有玩 / 無玩都可以入黎) ！」一眾JM積極討論點樣可以「減齡」換 Coupon，小編繼續訪問「減齡」達人！今次搵嚟JM 「youjump」一齊傾吓佢嘅「減齡」心得！佢由玩「大家減齡」APP開始，目標就係換到Garmin運動手錶，喺佢積極「減齡」下，終於換到價值$3599嘅Garmin Venu 2 運動手錶。到底佢點做到呢？小編一齊為大家拆解！

小編：「『大家減齡』有咁多獎賞換，點解會揀Garmin運動錶做努力嘅目標呢？」

youjump：「一開始我知道用運動手環或手錶可以得到每日靜息心率嘅分數，所以我揀咗Google fit 做大家減齡數據來源，再將用開嘅手環接駁Google fit，但就發現Google fit 唔可以攞到手環步數，變咗我每次行緊都要拎住或者袋住手機去記錄步數，加上我用緊嘅手環仲有其他不足之處，例如屏幕太細等等，每次步行時收電話或訊息都要拎手機出嚟，唔係太方便。

我見到有部份同樣玩緊『大家減齡』嘅BK JM本身有用開Garmin，都話唔使同時袋住手機就有步數資料，亦有好多JM努力儲分之下換到佢哋心儀嘅Garmin 運動手錶，於是我訂立咗明確目標，就係努力儲分換番隻多功能嘅Garmin 運動手錶！」

小編：「你每日可以拎幾多分呢？」

youjump：「我唔似得其他JM 咁犀利，可以每日行好多或者跑步攞足120分，通常我每日大概攞到6x-11x分不等(因為有時要督小朋友做功課同溫書行得唔夠多分)。」

小編：「Garmin 運動手錶要儲過萬分先換到，你每日又拎唔足120分，咁最後點樣換到隻錶呢？」

youjump：「『大家減齡』久唔久發起額外積分活動幫補吓，我3個幾月都儲到過萬分，原本我諗住換只需12000分嘅Forerunner 245，不過『大家減齡』喺9月尾時舉行激減大行動，部分Garmin錶大減至75折！見到大減價就當然可以將目標提升啦，不過每日可以得到嘅分數有上限，我又心急想快啲換到錶，惟有使出殺手鐗── 問朋友攞分！得到好友相助之下，我終於儲到18000分喇！」

小編：「Garmin 錶咁多款，花多眼亂，你又係點揀呢？」

youjump：「當儲夠分之後，我開始糾結應該換Instinct Solar 定係Venu 2/2S，因為我打算長期戴住手錶，手錶電池續航力對我來講好重要，於是我決定走去舖頭睇咗實物先決定換邊款錶。

去到K11 Musea Garmin 舖頭，佢哋陳列咗多款運動手錶，功能同款式都各有千秋！另外櫥窗亦擺放咗Venu 2/2S、Lily 同Venu SQ 唔同顏色嘅手錶，睇嚟呢幾款都係熱賣產品！當我見到Venu 2/2S 實物，我心諗：『就係你喇！』」

小編：「Garmin 錶Venu 2/2S 之間，你又係點決擇呢？」

youjump：「 Venu 2/2S 外型非常啱我口味，加上touch screen 操控簡單方便，當中Venu 2 錶面大啲，電池效能比2S 高啲，對於步行時經常留意步數、心率嘅我來講睇得更清楚。所以決定揀Venu 2！」

小編：「如果用戶想換Garmin 錶，有咩要注意嘅地方呢？」

youjump：「由於之前睇過唔少JM 分享換Garmin 錶嘅心得，就係每間舖每款錶嘅存貨數量不一，所以即日落去舖頭揀啱錶都未必夠現貨立即換領，最好預早一日打去舖頭留錶，同埋有啲特別顏色可能冇貨要訂，所以我都係抱住先揀款後取錶嘅心態去K11 Musea，不過可能我個日中午12點左右就去到，而睇中咗嘅Venu 2 黑色又夠現貨，所以可以即場換到。」

小編：「換Garmin 錶，要點連接返『大家減齡』APP?」

youjump：「Garmin 運動手錶同我之前用開嘅運動手環一樣，都係要喺手機安裝APP，先可以更全面用到隻錶嘅功能。安裝咗Garmin connect，完成簡單註冊同輸入基本個人資料之後，就可以去大家減齡嘅設定頁面，將數據來源轉做Garmin，輸入Garmin 帳號嘅email 同埋密碼就搞掂，不過記得剔埋”remember me”，唔係嘅話，日後手多多按入數據來源時又要再登入一次(我就係咁樣要再登入過)。」

成功連接之後，就會見到數據來源係”Garmin”喇。

小編：「Garmin 錶好唔好用呢？」

youjump：「Venu 2 原廠錶面冇顯示步數、心率等資料，不過佢有非常多錶面選擇，好多都係免費，亦可以自己upload 圖片做錶面，只要安裝埋Connect IQ app 就可以慢慢選擇。

除咗錶面，佢仲記錄好多資料，例如卡路里、壓力指數、呼吸頻率、上樓梯數、女性生理周期等，就連每日飲水量都可以記錄埋(當然要自己飲咗幾多水都做番記錄啦)，每當我收到電話或訊息都會立即通知，仲可以設定邊啲手機APPS 嘅通知會發去Garmin 手錶，對比喺我之前用開嘅運動手環，Garmin 運動手錶功能同外觀都優勝好多。