【育兒記】疫情下的寶寶。戴口罩訓練
戴口罩、買口罩買到窮，已成為生活一部分...
回想返，和牛B個妹妹出生於疫情最嚴重嘅時期，好記得當時住醫院都提心吊膽。
自己住醫院期間，全程包括瞓覺都戴口罩。只有在進食、飲水期間先除低口罩...
但BB可以點呢?
咁細嘅BB唔可以戴口罩，因為佢哋呼吸比較弱，所以係絕對唔可以戴口罩!!
我唯一嘅辦法，就係帶定便攜式嘅空氣淨化機放喺BB床入面(放於安全位置)。
仲記得妹妹出院嘅時候，就最為擔心....
當時防飛沫罩仲未盛行，市面亦未見有得買。
我唯有單手抱住妹妹，另一隻手拎住「立體口罩」幫妹妹遮擋，再上車返屋企。
到第一次返健康院，仍然未有防飛沫罩。
同樣唯有單手抱住妹妹，另一隻手拎住「立體口罩」幫妹妹遮擋或者餵奶巾。
後來市面上，終於推出更多適合嬰幼兒使用嘅防疫裝備。
真係超方便，而每個階段都有唔同嘅裝備可以選擇。
最初，妹妹仲細我會考慮推BB車加雨擋，就最全面!
而妹妹亦喺BB車入面，亦唔需要戴口罩同埋防飛沫罩。
到天氣好熱嘅時候，我哋嘗試過用呢款防飛沫罩。
不過，掛頸呢條繩一定要將兩邊夾實喺BB車先比較安全。
但如果BB大力拉扯...就通常都遮唔到BB了.....
另一個方法，同樣唔太work...
因為BB瞓喺BB車，頭仔左右郁動的話。
防疫帽會走位，同埋罩會飛起…
所以，唔係好夠周全保護呢....
如果用Hip Seat的話，用掛頸款防疫帽。
頭頂部份冇密封，少少通風...不過天氣熱都係會焗到妹妹出晒汗...T^T
到BB可以自行坐好嘅時候，戴防疫帽尚算可以遮擋。
到妹妹差唔多10-11個月大，我哋就開始同佢訓練戴口罩。
最初，我哋都會喺屋企同佢習慣一下。
但本能反應，佢第一件事就係會扯甩口罩，都係正常反應。
所以，最初經常都會扯爛口罩...
後來，外出我哋為咗安全起建。
戴口罩之外，都會戴上防疫帽/ 掛頸式防飛沬罩。
以防萬一，而呢個外出方式亦可以令BB習慣，外出係要戴口罩。
而家妹妹一歲半，已經習慣喺街要戴口罩了。
雖然，妹妹已經習慣戴口罩。
但當遇上妹妹扭計嘅時候，口罩都係會扯爛無數個...
所以，出街手袋一定要帶備4-5個以上嘅口罩....
其實呢種生活，到底幾時完呢...
好想出街影到BB笑梗嘅靚相呀...
Facebook：https://www.facebook.com/80smami
Instagram：http://www.instagram.com/wagyubmami/
MeWe：https://mewe.com/p/和牛b的成長日記
