【幾個移民媽】移居到外地 過時過節倍思親？Yo媽：氣氛愈來愈好
大家好，又係我YO媽同大家傾下香港澳洲大不同，今次我會同大家傾吓節日。以前喺香港，大時大節就梗係同家人或者朋友一齊慶祝啦！嚟咗澳洲頭幾年，柏斯嘅香港人又唔多，所以一啲都無節日氣氛。記得頭2年中秋節，香港牌子嘅月餅一定唔會喺呢度搵到，於是我屋企人就喺香港寄月餅同燈籠過來，當我滿心歡喜打開個郵包時，發現個月餅罐空空如也，原因係澳洲對於食品入口非常嚴謹，月餅入面嘅咸蛋當時係唔可以入境的，所以罐內除了一把膠刀外，還有海關給我嘅警告信，哈哈！
其次就係農曆新年，以前係喺香港梗係會買新衫過年、年初一至三都會周圍拜年， 食過年食品，真係好熱鬧。但西澳由於前幾年華人都唔多，完全無過時過節氣氛，好多時都係工作中渡過！如果想新年封利是，大家就真係要準備好利是封，因為呢度真係一封難求，如果你去銀行話要新銀紙，櫃位職員真係幫唔到你。不過可能悉尼嗰邊多啲華人，配套會完善好多。
記得我去年去一間喺香港都有的獅子銀行，分行附近特別多華人住，所以我就去取新銀紙同利是封，結果櫃位職員話$50、$20都無哂啦，問我$10要唔要。我準備話要100張之際，佢就話得8張，係8張！最後佢係畀左10個利是封我！自此之後，如果有比較新淨嘅紙幣我都會留起佢到新年封利是用！所以大家喺香港嚟嘅時候，記得帶定靚靚利是封！
不過近年因為西澳愈來愈多華人，唐人街食肆愈來愈多，仲有好多選擇！唐人超市都會因應不同節日出售有關食品，香港牌子嘅月餅、甚至香港人至愛嘅冰皮月餅都有得買。不過小朋友鍾意嘅燈籠選擇就一定無香港咁多啦！除咗中秋節、農曆新年外，端午節我哋都會約埋朋友一齊包糭，雖然包糭之前嘅準備功夫係多，因為自家製嘅材料好花時間，我哋用嘅臘腸、臘肉同咸蛋都係自家製嘅，大家包得開心，又食得放心。好多人都覺得嚟咗多年嘅香港人，真係咩都識煮！所以呢2年我都開始有返啲節日感，約埋一大班朋友共渡佳節！
今日又講到呢度, 下次諗下有咩大不同跟大家傾下!
利安環球物業創辦人及執行董事張肇麒（Terence）笑言，幸好小時候有父母一同移民澳洲，不至於患有「思鄉病」；亦因有父母一同到外地生活，他們仍有農曆新年「逗利是」的傳統，回想起當時實在相當幸福。雖然當地沒有太多傳統食品，例如月餅、全盒中的傳統糖果、油角等等，但隨著近年愈來愈多人移民，售賣中式食品的店舖也愈來愈多。「想食咩都有，愈來愈有氣氛！」因此，即將到外地生活的家庭不必過於擔心，「享受所擁有的就好」。
