28歲仔創業失敗望30歲有突破 創業打工一定2選1？
案主經歷︰
「我畢業就出嚟創業，到依家28歲結束所有生意。為咗交租、生活，做過跟車、保安，好多唔同散工。當中落差令我覺得好難受，我覺得依家人生好迷失。」
「人生好似已經無意義，過往創業所以無打工和工作經驗，都唔知點樣靠打工搵錢。原本報咗建造業課程，但身體腰骨天生唔好，長期太勞動又頂唔順。」
「啱啱申請咗公屋，不過單人申請要好長時間，當初因為做生意不利，所有股票都賣曬，我應該點做？」
「一︰學一種外語，裝備自己，去外地發展。」
「二︰返澳門安穩打份工，夜晚去澳門隊訓練，打波係我鍾意嘅運動，無錢途但個人會較開心和輕鬆。」
「三︰繼續留喺香港，可能試下搵政府工安穩工作。」
「就30歲，都唔知可以點做…同埋想請教下創業，點先做得好，咩方向先最適合？是否不應再創業？」
更多文章：【理財個案2021】30歲對人生的迷茫
個案重點：
‧30歲
‧試過創業又結束
‧無乜工作上的經驗
重點目標：
‧想突破
‧不知打工還是再創業
‧想裝備自己，或去外地發展
龔成老師意見：
我反而睇到，你比人擁有的優勢。
你試過創業，反映你有一定的生意經驗，要成功做一盤大生意，一般都要經歷幾次生意失敗，你已經行在相關的路道上，之後睇你心態。
你已經得到比同年人更多的生意經驗，之後就睇你有無本事用出嚟。
另外，你提到會「返澳門」或「留香港」，即是你是一個兩邊地區都有住過，有聯繫的人，你可以從這些方向去尋找生意機會。
同時，你提到「去外地發展」，反映你的心態是能夠向外發展，你的視野並不是狹窄的，你要好好想一些不止是香港的生意。我想信以你內在潛力，並不是跟車保安同散工，試試想得更闊。
如果你認為28歲結束所有生意，就等於你無生意能力，你就錯，因為做生意有失敗是好正常的，你唔好因為咁樣就否定自己。
做生意，唔單止只做「自己識的」，而是要做「市場要的」。
最初，可以利用自己熟識的行業去發展，因為會較易，而我相信每個行業都有當中的優勢與機遇，你要學會好好把握。
同時，當你在發展過程中，如果見到有一些機遇，無謂是不是你的行業，你都要好好把握。我認識一些朋友，最初只是做裝修，但之後見到機會，把握時間發展網上業務，取得不少市場，這就是本行與機遇的結合。
其實，做生意的其中一個要點，就是「試」，要「行動」，好多時要試先學到嘢，要試過先會找到市場，而大部分人，只是「不斷想不斷計劃」，最後就「乜都唔做」。你加油啦！
若然你有問題想向龔成老師發問，可在龔成的fb專頁中inbox龔成。
