【簡易食譜】焗希臘乳酪炸雞

希臘乳酪除左可以即食之外，仲可以用嚟整甜品同煮餸，今次等我分享一個超級易整得嚟又好味，仲好啱小朋友食嘅焗希臘乳酪炸雞啦！

材料真係好簡單，只要雞胸肉1大塊、希臘乳酪約4湯匙、鹽及香草少許及適量原味早餐片~

先將胸肉清洗乾淨然後切條，然後印乾水份~

然後加少少鹽及香草~

再加入希臘乳酪醃最少30分鐘(當然醃得越耐就耐入味..哈哈)~

係醃雞柳條嘅時候就可以準備早餐片，將早餐片倒入密封袋然後用桿麵棍壓碎~

然後將醃好雞柳放到早餐片袋中，待整條雞柳都沾滿早餐片~

最後就放入已預熱嘅焗爐，以180度焗15-20分鐘(焗嘅時間需要視乎唔同牌子嘅焗爐熱度來作出調整)~

話咁快脆卜卜嘅炸雞就出焗啦~

估唔到只係簡單用希臘乳酪咁醃，個雞柳都好夠味，再加埋甜甜地嘅粟米片，咁焗完脆卜卜之餘還一啲都唔乾，仲好JUICY添。

不過，一向重口味嘅小小豬話點少少希臘乳酪嚟食仲正哦~

依個炸雞真係零難度，而且只係希臘乳酪嚟醃，又唔洗用油，咁仲唔係食得健康，俾小朋友食多啲都唔怕！