【戶外放電】砌卡板迷宮 免費放電空間！卑路乍灣海濱長廊公園
最近去開香港區，就帶咗和牛B同妹妹去香港西區戶外地方放電~呢到有成5,900平方米，仲有維港海景睇~如果好天氣的話，睇日落係一流呀!!可惜我哋當日天陰，多雲仲有霧，所以冇日落睇...不過都唔緊要啦，因為和牛B一樣玩得好開心!!
我哋今次去嘅係位於西環嘅卑路乍灣海濱長廊，全日24小時免費開放!
交通都方便，可以喺港鐵堅尼地城港鐵站 A出口，沿土美菲路向海邊步行，大概5分鐘路程，轉入城西道，卑路乍灣海濱長廊就喺堅尼地城巴士總站隔離。除咗港鐵之外，亦可以乘搭巴士 18P, 18X, 113, 904等，於堅尼地城巴士總站落車。
呢到空間大，最特別就係有好多藍色卡板俾大人、小朋友搬嚟搬去玩~~仲可以利用卡板砌出迷宮、起返個小花園、小隧道亦都得!!
Photo from ^ 卡板小隧道
Photo from ^ 卡板迷宮
公園入面仲有之前聖誕原素(雪車)、新年嘅賀年全盒裝置。賀年全盒裝置一次可以容納好多小朋友，辛苦大人合力推動全盒~等全佑可以旋轉360，仲有特式嘅移動心心椅~至於雪車款嘅車仔，打卡、一家大細坐喺上面稟走公園都唔錯~
海廊長廊公園沿海路段唔算長，但係就可以欣賞到西九龍、昂船洲大橋和青馬大橋。夜晚嘅時候，仲會亮起欄杆上嘅特式光管，夜晚嚟打卡相信都會好靚呀!!
公園地方非常大，入面仲可以玩滑板車、滑板、滾軸溜冰等。所以小朋友進行玩樂嘅時候，大人都要睇實小朋友，以免碰撞受傷哦，而有養狗仔嘅你，仲可以帶埋寵物一齊去公園嘅寵物公園區放電~ 另外，公園入面設有洗手間，不過廁格唔算多，所以唔好拖到最後一刻先去廁所呀~~
