【幾個移民媽】外國聖誕節氣氛好 家家戶戶自己設計聖誕燈飾
以前細個喺香港聖誕節就會去尖沙咀睇燈飾， 澳洲外面冇乜燈飾睇㗎，通常我哋自己屋企都會整聖誕燈飾，而且仲整得好誇張。而每一年我哋嘅活動就係食完飯後揸車去唔同區，睇每家每戶設計嘅聖誕燈飾！
而聖誕節喺外國嘅氣氛特別好，除咗家家戶戶都會有自己設計嘅聖誕燈飾之外，假期前大家都會周圍買禮物，再帶返學校送畀同學！一齊慶祝聖誕咁話喇喎。小朋友都會好用心咁寫祝福嘅字句，再自己包禮物送畀同學仔。
另外，西澳柏斯仲有一個景點我都想推介畀大家，就係Chocolate Factory朱古力廠。最近我哋都去咗買禮物，見到朱古力廠都專登花心思布置咗好多聖誕嘅裝飾，仲有好多聖誕朱古力禮物包，等啲客人可以買嚟送畀朋友仔，真係好貼心！喺朱古力廠仲可以任試朱古力，不過因為疫情關係，最好都係用返佢哋提供嘅膠杯仔名消毒雙手先好食啦。
