【理財個案】資金作買樓還是創造現金流？
阿Sir 你好，我係你2017年學生，因為實在太懶，讀完之後只係月供煤氣同盈富，不過都已經賺得學費有突~多謝你先！
想請教一下你對買樓同收息股既取捨。
我今年32歲，單身，資產約80萬左右(現金65萬，股票約15萬)，收入約3.5萬一個月，每月月租$8.5K(屋企問題無得慳)，儲蓄約1.5萬一個月，因為靠佣金收入，最高只能做8成按揭。
見近期樓有D舊樓有$400萬以下，考慮緊買好定繼續租樓租好。
如果80萬全部買收息股，當7厘息，每年可收5.6萬息，可減輕租屋負擔，但相反，如果全部比首期，反而支出仲大，要供樓+雜費差餉，要約1.3萬1個月，但供樓又會有稅務減免
我明買樓同收息股同樣有跌價風險，所以想請教下你意見，到底應該上車還是收息創造正現金流? 謝謝你~
個案重點:
•32歲，單身,
•持有現金65萬，股票約15萬
•月入3.5萬,不穩定
重點目標：
•置業
•買收息股創造現金流
龔成老師分析：
有兩個考慮因素，第一，資金成本與投資的回報。
你投資股票，就能利用股票得到財富增值，你買物業，其實物業都有增值的能力。我地睇翻現時的租金回報率，利率，以及股息回報率。
可以初步理解，投資股票的值博率仍較大，股市處於合理區，而樓市則處於略貴水平，不過，香港樓長期供應不足，所以樓價長期仍向上。
另一個考慮因素，是你的自身情況，你現時未有物業，每月支付租金，這是一個「一去不返」的支出，而買樓後，樓是你的財富，供樓並不是「一去不返」，當中只有利息支出是一去不返，而這個利息在現時並不大。
因此，其實你長期來說，買樓是較好，但就未必是這一刻，可以在今明兩年，我相信樓價長期向上，但如果今年樓價下跌，不要期望太多，只要再跌多5%-10%，相信已是入市時機。
同時，你可以利用不斷睇樓的方法，同時不斷大力還價，目標是碰著一個心急賣出的業主，咁你就可以買到平貨。
