「一孕傻三年」懷孕後由過目不忘到失憶症
以前可以瀟瀟灑灑咁出門口，而家出門口之後成日都懷疑自己有冇鎖門。以前喺職場上叱吒風雲，而家呢頭講過嘅嘢，轉個頭就唔記得！呢一切，都係由BB來臨開始發生～
有網民話聽講生完仔會變蠢，但自己就覺得開始懷孕就已經失晒魂！有咗BB之後，第一次冇帶銀包出街。以前不知幾精明，從來未試過。唔少網民都留言話自己試過，好似原本諗住買嘅嘢到最後都唔記得買；呢分鐘擺低咗樣野，下分鐘就唔記得擺咗喺邊；有人仲鑊鑊出咗門口之後，都要折返睇吓自己係咪真係有鎖門，完全信唔過自己嘅記性！
有人講過「一孕傻三年」，媽媽網民話生咗記性仲差！尤其在職媽媽特別感受到工作狀態嘅差別。好似明明已經拎咗個file返位，結果完全忘記，摷極摷唔到時同事提返，先記得自己一早收埋咗。呢個時候，真係好想問：我個腦去咗邊啊！有媽媽話自己簡直係由「超級電腦」變成「人頭豬腦」，咁樣自嘲好似嚴重咗啲，不過好體會到嗰份無奈呀！
自己生咗小朋友先明，有時呀媽咁煩講嚟講去都同一番說話，其實佢都唔想架。因為自己都控制唔到，講完都唔知自己講咗，哈哈。老土講一句，自己蠢咗唔緊要，最緊要啲「醒目」同「智商」係過咗畀小朋友！
