【免費參觀 認識貨幣】全新金管局資訊中心

還記得六月初時，小小豬睇完圖書介紹之後，佢就滿心歡喜咁帶DADDY去依個新地方參觀，點知我地去到嘅時候就有一半展覽正值維修，咁就只好失望而回。有個愛豬號DADDY為左令個仔開心，所以佢就不時上網留意維修進展，終於有重開嘅消息，小小豬一知道就連DADDY都唔等，急不及待要我佢上去參觀。

哈哈哈...依個咪係金管局資訊中心啦~

金管局資訊中心佢係開放俾公眾人士(最重要係免費)，不過為免造成擠迫同埋安全為由，佢地係會有人流實施限制，基本上參觀人數上限係30人，如果過多人參觀就要等(我同小小豬都係樓下等左半個鐘先有位上去參觀呀)。

另外，所有參觀人仕都要出示有相片嘅身分證明文件以作登記(好彩一向我都影底小小豬護照個人資料嗰頁係手機，所以完全冇問題)。

一入到去小小豬就已經要四周圍參觀啦~

首先就係睇下個「歷史長廊」，介紹香港貨幣同銀行嘅發展歷史~

然後就睇下全新「貨幣」展區有咩新嘢先，望落就好似多左唔同嘅互動元素，同埋有啲小遊戲等小朋友可以玩住嚟學習認識貨幣。

先嚟睇下六個鈔票嘅防偽特徵先~

仲有以故事形式睇下印鈔紙嘅製作過程~

仲可以睇短片了解鈔票印刷過程~

睇完短片仲可以玩互動遊戲，睇下有冇專心睇片呀~

仲展示一啲無障礙鈔票設施，等視障人士都可以辨別鈔票嘅銀碼(真係大鄉里....我都係第一次知道有依啲設施)~

依度仲有一個小遊戲，等我地發揮創意，設計一張獨一無二嘅拾元鈔票。當然只限係螢幕上，所以設計好記得影返張相留念啦~

收銀車好多時會多到係屋村停泊，但又真係未上過去睇下入面嘅情況。所以就可以透過展版同埋平板電腦上，將收銀車變成實景，就可以了解多啲佢嘅運作~

依個鈔票硬幣知多D都好有意思，會展示香港鈔票同埋硬幣嘅冷知識、歷史、法律同埋日常生活.....小小豬都睇左好耐，仲好似好叻咁考返我轉頭添~

依度仲所有香港現時流通鈔票與硬幣嘅實物，平日用就用得多，不過又真係唔會好留心睇下邊間銀行係用咩圖案，所以就可以趁依個機會細心睇留意下啦~

嘩..連2018年最新推出嘅都有，不過就只有1000元，其他嘅新鈔票就要遲啲正式推出先有啦~

展覽場中間有一件名為「銀紙經」嘅裝飾，加埋啲燈光效果都真係幾靚呀~

原來係佢一啲不再流通嘅鈔票切碎而造成，所以睇起嚟就更加特別~

依個展品可以話係全場最特別、有意思同好玩嘅地方，唔止小小豬....就連我都睇左好耐，亦玩左好耐呀...哈哈哈~

因為依部機以互動電子方式展出從香港歷史博物館收集香港政府同埋發鈔銀行150多年來曾發行過嘅鈔票設計同埋近60多年曾經發行過嘅硬幣，仲有一啲紀念鈔，有好多就連我自己都未見過呀~

而且最好就係可以將想了解多啲嘅鈔票拉大...反轉...咁就可以360度睇清啲啦~

仲有依個偽真假鈔票實例對比，咁我地就可以增加鈔票防偽特徵嘅認識~

當然唔少得依個由硬幣組成嘅維港風景，知唔知入面用左幾多個硬幣，同埋總值幾多錢，大家想知就入去睇小小豬聲音導航短片啦~

展覽後半部分就係主要介紹金管局嘅工作，點樣銀行體系、穩定貨幣穩定、管理外匯基金、香港係國際金融中心地位....其實依啲對一名剛升上小三嘅小朋友嚟講其實都係深左啲，所以小小豬都唔太明白係講啲乜，係佢心目中金管局就係管理錢..哈哈~

佢唔明都係啱(因為連我都唔係好明)，不過都有啲相關嘅小遊戲可以玩下呀~

由於金管局資訊中心就係IFC嘅55樓，又有一排列嘅窗，所以係度睇待景真係超靚，仲可以望到整個中西環同埋山頂嘅風景色，係度靜靜地住一陣人都舒服啲呀(當然...唔建議大家嚟只係為睇風景，剛才都話入場人數係有限制，都係留返啲位俾有需要人仕，係樓下等有位去參觀嘅心情都幾慘呀)~

一個免費又學到嘢嘅地方，都幾啱小朋友嚟邊學邊玩，如果有時間的話，報名參加埋佢個導賞團，聽埋專業嘅哥哥姐姐介紹，我諗一定會更加了解貨幣。

雖然參觀係無年齡限制，但我個人覺得比較適合小學生嚟參觀，一嚟佢地對香港貨幣有一定嘅認識易啲明白，二嚟學校都會有相關嘅題材會吸引到佢地自己學習(小小豬咪就係睇見一本同數學有關嘅圖書，之後就要嚟參觀)！

想知多啲詳細時間同導賞服務安排，可以去佢地官網望望呀：
https://www.hkma.gov.hk/chi/about-the-hkma/hkma-information-centre/hkma-information-centre.shtml