「動機」

動機呢回事，
真係好奇妙。

正面鼓勵或者會有幫助，
但係原來冇刻意鼓勵都可能會自發出現。

早兩日你突然之間話要試吓自己沖涼，
於是全程爸爸只係聲音導航，
開水沖身、搽番梘捽身洗頭、再沖水、抹身、著衫，
全部一take過自己搞掂哂。

今晚再重覆一次以上步驟之後，
「我真係識自己沖涼喇！」

幫咗你五年之後，
開始唔駛我喇。

以為你返學嘅日子先會覺得你長大得快，
點知停課呢段時間日日對住，
反而好似仲快咗。

踩單車、洗米煮飯、綁鞋帶、沖涼，
甚至便便之後自己清潔，
都係呢段時間學識嘅。

關於成長，
爸爸只可以喺隔離鼓勵，
然後慢慢等待。

到一日，
各樣事情都唔再駛我喇，
我個世界會變成點？