婆媳同住肯定無好下場？JM教路：唔開心關埋房門同老公傾就好喇！

在職傻媽，跟你分享與鯊寶的奇幻旅程

新冠肺炎疫情持續，為咗做好防疫，如無必要有好多人都選擇足不出戶，唔少行業都因為咁受到嚴重打擊，食肆、零售業相繼倒閉或者停業，職員被迫停薪留職，生活步伐都因為咁搞到亂晒龍，作為屋企經濟支柱嘅打工仔更加係徬徨又無助！

最近就有JM分享，因為6299相繼失業，為咗節省開支，99要搬嚟同自己一家三口住，雖然平日同99關係都唔錯，但成日都講啦「相見好，同住難」，屋企忽然多個人，好多生活習慣都要改變下，加上平日睇埋睇埋咁多JM「婆媳共住」啲經歷，都唔好話唔擔心！呢個影響，對於樓主嚟講真係晴天霹靂！

到底世界上係咪就無良好嘅婆媳關係呢？面對呢個改變唔到嘅狀況，各位JM都紛紛為樓主獻計，睇睇下又好似唔係想像中咁惡劣？

「平常心啦，人夾人緣，人哋嘅地雷未必等於你嗰個。」

「平常心面對，大家互相尊重。」

「同奶奶住都係衣著要保守啲，坐喺梳化坐得斯文啲！」

討論區熱話：武肺影響6299相繼失業要搬嚟同我哋住T_T

雖然話「婆媳關係」係宇宙級嘅難解問題，不過並唔代表係一個困局，唔少JM都提醒樓主只要互相尊重，自然有好多問題都可以化解，學習多欣賞別人優點，縮小別人缺點。

生活習慣就點都會有唔同，但作為後輩唯有學識忍讓；如果當中有咩唔開心，切忌直腸直肚咁講出嚟，關埋房門同C6傾下就好，借佢把口講表達，點都好過自己未摸清99性格就爆，如果唔係破壞咗大家關係，就好難修補！另一方面，C6嘅表現都好重要，絕對係開啟良好婆媳關係嘅鎖匙，所以同C6要好好溝通先係良策！

「家有一老，如有一寶。」，若然能夠和平共處、好好溝通，放低自己未必啱晒嗰套，話唔定獲益良多之餘，仲多個人錫自己呢！