【護膚診症室】轉換新年新髮色 不容忽視的頭部肌膚
呢排天氣乾燥，多咗病人都因為頭皮痕癢嚟求診；病人話痕都算，但返緊工痕起上嚟，實在唔好意思大庭廣眾係咁抓，令人非常苦惱，而且有時抓完，仲會成頭都係頭皮，甚至係一片片雪花咁散落喺件衫度，場面好尷尬。
其實天氣乾燥只係誘發頭皮問題嘅其中一個原因，要好好護理頭部肌膚，個人習慣都係好重要；提到有唔少嚟求診嘅女士都有染髮習慣，當中嘅染料含有刺激成份，有機會令頭皮出現敏感反應，導致發炎兼引起痕癢，嚴重的話，仲會產生皮屑問題，亦有見過藝人因為工作需要，經常要染頭髮，最後甚至出現脱髮問題！至於男士們亦都唔例外，Gel頭用嘅髮蠟同定型用品等，都會有機會產生頭皮問題。
要避免出現頭皮問題，就要從多方面入手！
首先，染髮嘅話，最好可以減少次數，同埋用有信譽嘅染髮品牌，或者用天然嘅染髮用品。另外，洗頭水方面，要仔細睇清楚成份標籤，選用無香料同防腐劑嘅產品，如果頭皮容易乾燥，可以揀比較滋潤嘅洗頭水，例如：含有橄欖油或堅果油成份嘅產品，咁就唔會因為洗頭，而令到頭皮乾噌噌又敏感啦！
千祈唔好睇小頭皮問題，嚴重嘅頭皮發炎有機會令毛囊永久受損，而唔識再生頭髮，所以如果頭皮有發炎嘅情況，就應該盡快睇醫生，醫生會處方類固醇同抗生素等藥物，紓緩頭皮發炎，同時為底層消炎。
