【冬日護膚】全靠廚房入面支橄欖油？

天氣開始轉涼，踏入冬天，乾燥嘅天氣容易令皮膚變乾，甚至係出現細紋，所以補濕就非常重要啦！

以下有幾個冬日護膚小貼士俾大家：

用溫水洗面

「冬天咁凍，啲水凍冰冰真係好難忍喎，用熱水舒服咁多，都係1、2次啫，都OK㗎嘛⋯⋯」嗱，咁諗就錯啦，因為真係1次都唔好。

用熱水洗面會過份洗走面上嘅天然油份，又會刺激皮膚，到時皮膚炎就麻煩啦；洗面最好就用室溫水啦，但有時真係太凍，用微溫水都可以㗎

定時補水

就算朝早搽咗幾多層厚cream，到咗下午就總係開始皮膚乾，但又化咗妝好難再搽cream驚整花個妝？

我通常用花水混合透明質酸精華，裝落噴霧樽度，隨時都可以噴幾下補濕keep住皮膚水潤，怕麻煩嘅就可以直接用屋企有補濕成份嘅化妝水。

鎖水用油

有時用咗好厚嘅cream都覺得唔夠滋潤，可以試下用油加強鎖水；市面上有好多嘅護膚油都以幾種植物精華油混合而成，有齊各種油嘅好處，例如係抗氧化等功效。

而最就手嘅就係喺屋企廚房入面嘅橄欖油，，隨時加一滴落cream度混合再搽喺面，都幫到手咖，效果唔錯又經濟。

由內而外

當然要記得飲夠8杯水啦，如果唔係個人身體入面乾噌噌，搽咩喺面都無用啦！