【包媽孕記】QE物理治療部產前運動班及分娩球班
坊間有相當多產前講座，大致可以分為政府及品牌舉行，奶粉商親子網站舉行嘅講座，最大吸引力當然就係有好多母嬰禮物，而政府嘅就相對實用性強。
公立醫院生BB，由產檢時要自助度高磅重量血壓，到生產後自行照料BB，雖然係辛苦啲，但現今香港醫療資源嚴重不足之下，其實公院仲有提供好多免費資源俾大家，例如產前講座，仲有物理治療師主講嘅產前運動班！
人人都話孕婦陀穩咗，大約3個月後就可以慢慢做啲運動，有助生產時更順利，不過對於包媽呢啲第一胎媽媽，淨係運動都未必識生㗎嗎……其實公立醫院有產前運動班可以俾大家報名！
之前都分享過包媽揀咗喺QE伊利沙白醫院產檢，有啲媽媽話第一次大約10WK產檢時，拎到嘅一大疊資料中已經有報名表，但包媽搵極都唔見，問過同是L Block嘅準媽媽都一樣無……所以之後返QE產檢時就問姑娘拎FORM，填好後FAX預約即可。第二日朝早姑娘已經打電話CONFIRM上堂日子啦！
***報名表上寫明，要懷孕16-32周嘅準媽媽先可以上堂，最好由爸爸或家人陪同﹗多胞胎、產前出血、胎盤前置等就要先資詢醫生~~
產前運動班TOTAL有三堂，上堂時間會係星期六上午，每堂1.5小時，第三堂1小時，不過姑娘一開始打嚟只會俾兩堂時間，第3堂分娩波班要喺上第1堂時課後報名，大家記得唔好遲到早退﹗
上堂當日先到P座地下登記及繳費，公務員醫管局及其家屬免費，其餘$135一堂，其後就可以上P座2樓運動場上堂（由於講明上堂期間唔可以影相，所以只能文字分享）
產前物理治療第1堂（1.5小時）
呢日有18人一堂，另外老公坐旁邊，主要分3大部分，懷孕期身體變化、腰背護理及產前運動。第一PART比較多理論，但好快就開始有實習環節，包括教授孕婦坐姿，睡姿，一啲簡單運動可以喺屋企甚至office做，舒緩腰痛嘅貓式同孕婦瑜伽有異曲同功之妙，另外仲有骨盤肌肉運動，有小冊子可以拎返屋企跟住練習。
產前物理治療第2堂（1.5小時）
第2堂主要有3部分，講解分娩過程，教呼吸控制，同按摩抒緩不適（家人幫手）；陣痛初期，陣痛之間用腹式呼吸（深入鼻吸口呼）放鬆；後期淺速呼吸。好大篇幅近45mins教老公點幫媽媽按摩減痛，由背脊，腰，盆骨突出位置按壓，腳要下至上免水腫，超舒服！
產前物理治療第3堂 - 分娩球班（1小時） *必須老公或家人陪同
分娩球歷史：香港2000年後引入，第一產程時使用加按摩呼吸，幫bb轉至正確胎位（面向媽媽背脊）。直立式膝跪式姿勢待產，地心吸力原理有助胎頭轉位，縮短產程。165cm以下用55cm直徑球，以上用65cm直徑球：
姿勢1:坐球上盤骨前後，左右，上下輕微彈
姿勢2:坐球上向前傾掂床盤骨前後，左右，上下輕微彈
姿勢3:跪地趴上球盤骨前後，左右，上下輕微彈
仲有小冊子可以拎返屋企跟住練習~公立醫院生嘅媽媽記得報名啦~
