17歲隱青足25年 變咗42歲隱中 網民：父母造成 仲好意思呻?
Forum有個Post，樓主話佢親戚個仔中學畢業做過三年工作後，就開始做隱青，由20歲隱到40幾歲變隱中，樓主個親戚成日呻點解會生咗個咁嘅仔，但樓主可能旁觀者心水清少少啦，佢覺得係親戚自己縱到個仔咁，成日驚死個仔食唔飽，又幫佢交上網費，個仔飯來張口，食完嘢又唔自己洗碗，由以前正常身型到而家肥到百幾公斤……
Juicy媽真係睇到眼都突，心諗皇帝都要批閱奏摺處理吓國家大事吖，佢嘅生活仲歎過皇帝喎！點知原來係Juicy媽見識少，因為個Post下面勁多人留言話身邊都有呢啲隱青、隱中例子！吓？而家開「7仔」咩，梗有一個係左近？
其中一個留言話，有親戚個仔16歲開始就冇讀書，出社會做咗一年嘢，跟住就由17歲到而家42歲都喺屋企做隱中，日日喺屋企炒吓股賺二、三百蚊就收工，如果賺唔到，佢阿媽就每日畀一百蚊佢，25年嚟都係咁……
嗱即係咁，Juicy媽其實都好想隱蔽返10年、20年，不過我媽子由細就教我做人要有膊頭，大學開始就已經唔畀零用錢，要我自己返兼職賺幾多洗幾多，畢業後就算唔返工都要畀家用。所以實在好同意個Post大部分留言，啲仔女變成隱蔽青年、隱蔽中年，好大部分都係佢哋父母自己攞嚟，乜都幫佢哋做埋，又畀零用又幫佢哋交上網費，完全就係「怪獸家長」嘅典範。而人係有惰性嘅，試問當一個人乜都唔做都可以生存得既舒適又寫意，咁仲邊有動力改變自己行返出社會呢？
Juicy媽都睇過嗰啲談討隱青問題嘅節目或者文章，衰啲都要講句，養不教，真係父母之過嚟架！初初發現仔女出問題就應該積極正視，而唔係由得佢哋喺屋企擺，過吓又一年，過吓又一年，咁就變隱中，到時如果父母兩腳一伸，咁個隱中點生存？
