小包成長小本本之幼稚園大作戰 (一)

今年的夏天時間過得特別快，除左因為同時湊住小包同小冬甩兩兄妹，令到媽媽攰到甩轆之外，係因為小包要開始番N班啦！一講到開學就會覺得暑假已經過去，冇得日日周圍去玩啦... 不過取而代之嘅係一個新嘅學習玩樂環境。小包已經番左一星期嘅分離適應班，暫時見佢都玩得開心，老師對小包都好好，都算係安全過渡啦！

小包嘅幼稚園大作戰除左係要開始適應新環境，媽媽都要開始我嘅另一項作戰計劃~ 就係報！K！1！

相信好多媽媽都有同我一樣，呢頭先叫安定左個N班，果頭又要開始下一輪K班爭位戰，真係頭都大埋。不過冇計啦，想小朋友讀間好學校係每個家長嘅願望，所以大家都會好勤力搵資料、報名同interview。即使好似包媽呢D唔係咁進取嘅家長，都要開始做野啦！第一樣要做嘅當然係向教育局遞交幼稚園入學註冊證申請啦！

咁幼稚園入學註冊證係咩黎ga呢？簡單黎講，每位適齡入讀幼稚園嘅小朋友，要入讀教育局幼稚園教育計劃下嘅幼稚園 (即係所謂嘅券校/資助學校)，就一定要有註冊證，學校先可以收你。就算你target全部都係私校，但touchwood到時一間都唔收，你冇證就有機會連你原本冇打算讀嘅券校都冇得入... 所以包媽提提大家點都申請左先。

黎緊2020/21年度嘅幼稚園入學註冊證申請已經開始左啦～2017年12月31日或以前出世嘅小朋友都可以申請。大家可以係教育局網頁下載表格。

此外，各區民政事務處、郵局同教育局區域教育服務處都可以拎到表格ga。記得11月底前就要連同申請文件郵寄或者親身交去教育局嘅指定收集箱丫！