「愛?沒有懼怕」

0340，

終於你又再入睡。

／

今日媽媽帶你出去玩，

大半日冇見過爸爸，

到我返到屋企你一早就瞓咗。

凌晨兩點幾，

你發惡夢醒咗，

但係一直好似半夢半醒咁，

一路喊一路喊一路喊。

你話你唔鍾意自己，

再問之下，

原來喺夢入面爸爸好惡咁話你，

而你好驚畀爸爸鬧。

我話發夢係假嘅，

你話發夢係真嘅。

望住你咁喊法，

我為我喺你個夢入面鬧咗你同你講對唔住，

然後你開始可以慢慢冷靜返少少。

／

氹緊你嘅時候，

媽媽話覺得其實你應該係好掛住我，

我都信，

只係作為一個爸爸，

個仔掛住自己會發惡夢然後喊成咁，

我呢個爸爸都好失敗。

我不禁又再反省起嚟。

我的確好耐冇大聲鬧過你，

反而我多咗同你講：

「你成日應承咗我都唔做我會好失望」

「你明知道係錯嘅都特登做我就唔會溫柔」

「我應承咗你我會溫柔，

我有努力做但係你都要幫我架」

唔，

我將個責任放哂喺你度。。

我以為我係用緊另一個唔駛鬧嘅方法去教你，

我以為我清楚表達我嘅感受係啱(哂)嘅，

我以為我好了解你，

我以為我好識得教你，

我以為自己已經做得幾好。。

／

「愛裏沒有懼怕；

愛既完全，就把懼怕除去。

因為懼怕裏含著刑罰，

懼怕的人在愛裏未得完全。」

聖經-約翰一書4章18節

我一直希望將最多嘅愛放喺你心入面，

我冇懷疑過自己做唔做到，

不過我呢份愛睇嚟唔多合格，

因為你心入面對我呢個爸爸，

彷彿有好多懼怕。

你係一個好敏感嘅小孩子，

然後爸爸好想教好你。

可能每一次爸爸以為自己教緊你，

但係你只係敏感到我嘅情緒，

根本聽唔到我講緊嘅内容。

我諗，

無條件嘅接納，

應該比義正辭嚴嘅管教行先一步。

我愛你，

唔應該係因為你乖／聽話／做得好。

單單因為你係我個仔，

無論你係點我都一樣咁愛你。

點解當你有嘢做得唔好嘅時候，

我就好似放低咗呢份愛咁呢？

「沒愛的真理是嚴苛，

沒真理的愛是軟弱」

- Pastor Lia (Heart of God Church)

無論如何，愛行先。

呼，繼續努力。