點解唔成日食Buffet？點解唔想我做消防員？我鍾意喎.....

答：Buffet(自助餐)係一種「想要」而唔係「需要」，因為我哋每日所需只係三餐溫飽茶飯，並唔係要每餐都要食到超飽、超豐富。有時逼自己食得太多可能會更加唔舒服，同影響我哋嘅健康。咁唔係「貼錢買難受」？當然，有時同屋企人或者朋友食餐buffet 慶祝都冇問題，不過我哋更加應該將啲錢儲起，以備不時之需同埋消費於我們更加需要嘅嘢上面。

答：我知道你想做消防員嘅原因係幫到人、服務社會之餘，又可以着上醒目嘅制服。其實社會上有好多其他嘅職業同樣都可以是幫到人、服務社會，我希望你可以接觸多啲、認識多啲社會上各行各業嘅工作，了解各個職業嘅工作性質同埋工作要求，配合自己嘅興趣先至作出最適合嘅選擇，所以並唔需要急於喺現階段作出決定。

FinKAB話：小朋友對於工作種類嘅認識，大多數係圍繞著身邊接觸到嘅，或者係玩具、遊戲、卡通片內嘅角色，如警察、消防員、救護員、廚師等。家長可以透過職場體驗活動、參觀活動等，認識更多行業，發掘其興趣和潛能。