理財個案--欠債人士大翻身

你好呀成哥，我之前欠債不少，現已還咗大部份嘅債務，並而家開始可以儲到錢！

我想請教你，你成日都話要了解人地公司嘅業務，其實呢啲資訊我可以喺邊度搵到架？

如果我資金得2萬，應唔應該先買少少股票先呢？定應該儲多d彈藥先？

另外成日睇到話有月供股，想請問係點做架？係咪錢行就有架喇？期待你嘅回覆！謝謝你

個案重點：
‧過往欠債不少，現大部分已還
‧現開始儲錢
‧資金$2萬

重點目標：
‧想開始投資
‧月供股票是否適合

龔成老師分析：

你最好儲多d現金先投資，了解下股票先，唔洗心急。

我地進行理財，其實是一個攻守兼備的過程，你之前就是理財不善，令自己處於不利局面，這刻要一步步做好理財，不要急賺錢。

首先要做好防守的部分，例如現金，之後有閒錢剩，就可以作為進攻，即是投資的部分。同埋，理財是一個長期的過程，唔好比中短期的因素影響。

我地投資股票，就是買入企業，你試想想，如果你有朋友叫你夾錢做生意，你要了解d咩？當然是生意做成點啦。而買股票都一樣，原理是將你的錢，入股到該公司中。

你可以到財經網站了解企業做d乜，這都是基本步。下一步就是更深入了解企業，包括年報、該企業的網，甚至從產品去了解。之前我投資過六福（0590），其中一步分析就是去睇六福的鋪，當時睇左十幾間，睇佢的生意做成點，先決定投資這股。

月供股票要先到銀行登記，每月投入相同資金，買入一隻或多隻的股票，例如月供盈富（2800），假設你定了每月供$2000，如果佢今個月股價$20，銀行會幫你買入100股，到下個月，佢股價升到$25，銀行就會幫你買入80股，如此類推，一直累積。

如果你每月能儲$3000以上，其實已可以開始進行月供。