【包媽孕記】終於足月了﹗準媽媽孕期十萬樣擔心
望到手機懷孕APPS寫住37WEEK，心裡面有種莫明感動。大家睇包媽好似好外向善於交際，但原來懷孕時荷爾蒙影響下，真係會每事擔心，瞓唔著亂諗嘢自己嚇自己更加係無限時發生。
- 未照到胎囊怕宮外孕
之前有分享過當初發現包包存在，係打風後流啡即刻去急症室，白車載我哋去附近有婦產科嘅醫院，拖住老公隻手只識一路喺度震……去到醫院必須留院觀察一晚，望住老公轉身離開眼淚已經忍唔住，姑娘好溫柔問我有咩事可以同佢傾訴……嗰晚完全瞓唔到，如果因為自己操勞令包包有咩事點算好……T.T
- 怕照唔到閃閃
第二日照陰超因為周數太細要抽血驗HCG，開始隔日到醫院嘅日子，抽血到雙手瘀晒都不及擔心嘅痛……等到5W2D終於見到胎囊，可以排除宮外孕，又要等多2周照閃閃……個人開始好易攰好易眼瞓，食每樣嘢都上網查清楚，深怕稍一不慎會影響包包……
【包媽孕記】Baby Shower公布性別 落手落腳籌備BB首個派對
- 孕吐怕BB唔夠營養
6WK起瘋狂孕吐，最高峰一日嘔5次，最怕係BB唔夠營養，預咗食完要嘔都逼自己放入口……10WK有一日起身返工，忽然上吐下瀉，打電話俾老公喊住話唔知包包會唔會有事……
- 怕染色體/器官異常
NIFTY PRO等報告會驚染色體有問題；照結構又深怕器官有異常
【包媽孕記】伊利沙白醫院QE L block登記方法及第一次產檢流程分享
- 怕過輕怕早產
呢幾關過晒，又開始諗自己同包爸出世得4磅幾5磅，包包出世會唔會太輕磅要住院？身邊唔少媽媽早產，日日同BB傾計叫佢乖乖地留到預產期
囝囝好乖好懂事，每次包媽擔心到喊時，佢都會郁下踢下，好似安慰我話俾媽媽知，包包一直都在。好感恩終於等到足月啦，到底會見紅穿水定陣痛先呢？
不過可以肯定講句，要擔心嘅嘢出世後只會愈來愈多，我會好掛住俾包包踢到肚變型嘅感覺架！
