A股ETF揀乜好

By 青冰 on 23 Mar 2019

專業嘅散戶，喜歡炒股票，受戰友(損友)慫恿開始寫作網上投資專欄，分析市況，同股友吹水，分享股壇樂事。

MSCI決定提高A股在新興市場指數的比重後，無疑令更多外資關注A股市場，青冰身邊亦有一些平時有玩股票但唔熟A股的戰友，話想買返隻ETF作中長線投資，今次先唔講A股有冇中長線投資價值，只係著手研究吓有乜好揀。

現時在港交所內掛牌的A股相關ETF，有逾七十隻，除了一些有行業概念的之外，主要都係追蹤指數為主，而富時A50指數、滬深300指數及MSCI A股指數的產品佔最多。南方A50 ETF(2822)，相信都唔需要多介紹，這個彷彿是本港散戶覺得必然要買的A股ETF，無他，因為專家及傳媒多年追捧，買A股就梗係2822啦，但其實有認真認識A50指數的並唔多，鬧出最多的笑話係，散戶成日睇住個上證指數，但就話隻南方A50唔跟，當然係跑輸先會鬧啦。

青冰經常批評恆指的金融股比重過高，但南方A50其實都唔低，銀行及保險類的股份佔49%，單係平保及招行的A股，兩隻加埋已經佔指數的20%，跟恆指的匯控(0005)及騰訊(0700)一樣，但睇慣恆指都知，大笨象同QQ又好少一齊大升的，總係會此起彼落，但內地上市的金融股，共同進退的機會極高，所以話A50指數更加唔平衡，不無道理。如果加埋第三大比重的茅台嚟睇，炒放水炒奢侈消費，相信這指數將跑贏，換言之如果係炒資源股，炒科網，唔見得佢特別吸引。

想分散風險，滬深300指數的ETF相對好啲，金融股加埋有三成，睇落唔錯，醫藥、機械及電子類別的股份比重，皆比南方A50高，而最重要一點，就係呢個指數是根正苗紅，由中證指數公司編制，現時在國內已有股指期貨，論將來的發展潛力，相信還是國產秤先。

MSCI在月頭的公佈，係分三階段提升A股比重，而在第三階段，即11月，會將中盤股，包括合條件的創業板股份，加進MSCI。國內的創板指數，一向都是炒家樂園，講真青冰真係唔識內裡有乜好股，但這個較偏門的概念，原來都有一隻南方中創業板ETF(3147)可玩，創指今年累升37%，比上證、A50及滬深300指數都更癲，如果戰友認為A股會繼續癲落去，這不失為一個好選擇。