親子樂=上山下海？ 互相陪伴就是我們專屬的快樂

身為雙職家長，老老實實返咗成個星期工，終於等到假期來臨，其實都真係想喺屋企攤下。但又唔想錯過珍貴嘅親子時間，於是就唯有將假期有咁密塞咁密，結果就算心理幾享受都好，生理同身體都好似返足7日工咁，日復日復日...

而講到親子樂，其實又點先叫高質呢？對於我呢啲做囡嗰陣都的唔起心肝去拍下拖、行下街嘅軟皮蛇，喺社交網度望見啲舊同學同自己嘅小朋友上山下海，確係自愧不如。而且有時都會唔開心，覺得係咪自己做得唔夠好.......但礙於條件因素影響，我哋本身兩公婆都無車牌，亦無行山郊遊嘅基本知識同經驗。更甚嘅係，我哋本身都唔係山系父母，莫非真係要為個仔連喜好都要改變？

喺羨慕嘅同時，我都開始了解到其實每個家庭都有屬於自己嘅親子樂，正所謂 「 Like mother, like son.」，有其父必有其子。我諗興趣同喜好劃多劃少都有啲遺傳，而且親子樂本身就唔應該有壓力，或者要刻意達成某啲目標。

只要用心，哪怕一齊攤喺屋企，睇下書、聽下歌、跳下BB舞呢？