【媽媽心聲】你長高了 拉近了你我之間的距離

剛剛出世嘅和牛B大概只有6X cm身長，而家和牛B 2歲8個月，身高達87cm，算唔算好高? 我諗唔算，因為我同和牛爸爸都唔係生得高。但和牛B嘅身高就離90(cm)後不遠了，90後嘅世界有好多唔同嘅轉變。可以玩到部份兒童機動遊戲、食放題要俾錢、搭港鐵要俾錢(達95cm高)…

諗返起初初出世嘅和牛B，細細粒，好似公仔咁，睇落去又瘦又長咁。

剛剛過咗一歲，學梗行路嘅和牛B，肥嘟嘟。o個陣時佢嘅高度，我哋手拖手都要屈膝遷就佢。

過咗一歲半有多嘅時候，明顯已經行得好叻，而我拖住佢手仔，已經唔需要喺高度上作太大遷就了。

兩歲半嘅時候，頭髮長咗好多，已經有一種少女嘅味道。你哋真係大得太過快啦…好快你會同我水平視線對望啦。

其實如果唔介意屋企幅牆劃花，我覺得有一幅度高牆都唔錯丫，係佢地成長印記嚟。