【自製玩具】輕便車仔收納袋及遊戲墊 - 便攜亦得

和牛B同小男孩一樣都好鍾意玩車車，唔知點解就係鍾意玩停車場、玩車。

出街要袋住一兩架車仔喺身，又好似散修修咁，而我最驚就係架車唔知幾時跌咗，唔見咗!!

對於小朋友嚟講，唔見咗架車係世界大事嚟!!

所以亦因為咁我做咗呢個輕便版便攜嘅收納車仔袋及遊戲墊，出街都玩到，特別係去餐廳等開餐嘅時候就可以俾和牛B消磨時間。

好似一本迷你書仔咁，可以放入袋到帶出街。

因為係自己Tailor-made嘅，所以Cover我就加上和牛B個名。
除咗可以裝飾，仲可以增添一份專屬感。

撕開魔術貼扣，就可以慢慢打開遊戲墊。

打開之後，就會見到4個車袋位，好似停車場咁。

再喺上面，加上馬路場景。

如果便攜嘅話，4架車都已經好多，所以遊戲墊大概A4 Size，都夠佢消磨一段時間。

**和牛爸爸問，和牛B有好多架車喎，得4格邊夠放。

重申: 呢個係便攜版，如果多車嘅話就要用另一個方法收納了~