【小小豬新加玻親子遊】Mr. Men & Little Miss Cafe Singapore

By KinseyMaMa on 31 Aug 2018

一切以小小豬為中心，讓小小豬擁有一個快樂的童年為目標。同隻百厭豬一齊整嘢食又周圍去玩，記錄我們這一家嘅生活傻事，讓大家可以陪同小小豬一起成長。

基本上我今次行程完全冇乜計劃去食啲乜特別嘢，都只係打算行到邊就食到邊(始終第一次自己帶住個仔去玩都唔致走太遠)，不過唯一有計劃嘅就係依個MR.MEN主題餐廳。

因為係我地上機前係FACEBOOK見到介紹，睇見到個地址都係離酒店只係八分鐘路程，咁近都冇理由唔嚟食啦~

初時都打算嚟食晚餐，不過上網睇過餐廳嘅食物介紹，好似啲甜點比較吸引多啲啲，所以最後我地就決定趁去玩完攰攰地，就嚟食個甜品當下午茶休息下啦！

由於小小豬都有睇開Mr. Men系列嘅圖書，所以佢都對一眾主角都唔會陌生，當入到餐廳見到咁多Mr. Men，佢都不知幾興奮~

四周圍都用左Mr. Men再加上新加坡特式做佈置，都真係好靚呀~

座位旁都放左好多唔同嘅公仔，當然又係影相好時機啦~

小小豬見到咁多公仔仲主動叫我幫佢影相添(放心....啲公仔都好乾淨呀)~

仲有每一張枱都有一個人物做主角，超可愛呀~

仲有Mr. Men & Little Miss 連餐牌~

一入餐廳就掛住周圍影，終於到左食嘢嘅時候。由於係即叫即製(我眼見好似得一位廚師處理食物)，所以等嘅時間都比較耐，所以.....應該一早order左食物先用圍行，咁就可以慳啲時間。
先嚟一杯Butterfly Pea Flower Momo Juice~

蝶豆花再加上桃子茶，單睇都已經心心眼，飲落個味道都唔錯，小小豬都飲左大半杯呀~

Mr.Strong Milo Red Velvet Waffles~

店員一送到我地都嘩嘩大叫，因為真係好靚呀。除左靚之外，其實佢味道都好好食，我就最鐘意佢個美祿Brownie，入口好香美祿味但一啲都唔會覺得好甜。當然仲佢個紅絲絨窩夫都好吸引，我都係第一次食紅絲絨甜品，個味道又幾得意喲。小小豬就當然最鐘意個士多啤梨雪糕同啲棉花糖生果，轉眼就俾佢KO晒啦！
Little Miss Princess Bandung Strawberry Parfait ~

士多啤梨加牛奶雪糕已經好吸引，睇埋士多啤梨蛋糕同布甸，仲有士多啤梨味早餐片，完完全全係士多啤梨宴，小小豬同姨姨兩個都依得不知幾滿足呀。

咁靚嘅甜品就當然係相機食先啦~

餐廳內都可以買到啲Mr. Men & Little Miss嘅精品，當然又係我教小小豬...睇左當買左嘅時候啦...哈哈哈~

哈哈....雖然只係甜品，不過我地三個人都依得好飽飽，超滿足呀。唯一就係覺得貴左少少，我地order依三個甜品匯返港幣都要大約三百幾蚊(唉...唔知點解總係覺得新加坡食嘢都幾貴)。